كل يوم دلوقتي اصحى اصطبح باخبار زفت و تصريحات ازفت
بعد ما كان من شهرين تلاتة كنت كل يوم بانام متنكدة و متكدرة من تحت را س المجلس الخنشري اللي الناس فيه انتهت صلاحيتها كما انتهى طموحها و تطلعاتها و امالها لمستقبل افضل لهذا البلد و اصبح كل ما يفكرون فيه كيفية الاحتفاظ بكراسيهم اطول فترة ممكنة !!!
ايوه كراسيهم ..لان و باختصار كل الناس - و حتى اللي كانت مؤيدة من منازلهم لاي ظرف و ده ما يقللش منهم طبعا-اللي نزلت في الثورة و هي شايلة ارواحها على كفوفها كانت متاكدة انها يمكن عمرها يروح او تخرج من بيوتها و ترجع بعاهة مستديمة..
و كل ده عشان لا شيئ ..ايوه لا شيئ ..عشان زيرو مكاسب
و كلنا عارفين ان اللي كان ح يحصل مش احنا اللي ح نجني مكاسبه ..يمكن اولادنا و احفادنا
و الاكثر تفاؤلا كان عنده امل ان الحالة الاقتصادية فقط ممكن تتصلح اول ما تيجي سلطة منتخبة من الشعب حتى لو كانت فاسدة فمازال لدينا الفرصة لتغييرها على عكس ما سبق ووقتها سيتحمل الجميع نتيجة اختيار الاغليبة حتى الانتخابات التالية و لكن ستحدث انتعاشة و ستخلق فرص عمل و سيكون هذا ملموسا على المدى القريب و البعيد..
و المؤكد ان وجود مبارك الآيل للسقوط على راس نظام فاسد كان سببا في انهيار جميع الفرص امام الاستثمارات الاجنبية التي من الممكن ان تستوعبها بلد كمصر بتعداده الهائل و موارده البشرية الضخمة و هذا اختفى الان.
و السؤال الذي يطرح نفسه : من اين سياتي النظام الجديد.. ..؟
اذا كان المناضلون من اجله يتناقصون يوما بعد يوم
اذا كان مؤيدوه و مريدوه يضربون و يسحلون حتى وقتنا هذا
اذا كان صانعوه يتهمون بالخيانة و العمالة للاجنبي
اذا كانت كل ام و كل اب الان يخافون على ابناءهم اكثر من ذي قبل لان سجون الداخلية ارحم بكثير من السجن الحربي الذي لربما لا يعلمك احد من الاساس ان ضناك مرمي فيه
اذا كان كل من سعوا و ضحوا بارواحهم او كانوا على استعداد للتضحية بها و ما زالت لديهم النيه يا اما قابلوا رب كريم يا اما فقدوا اعينهم و احد اطرافهم او يقبعون في غياهب السجون...و يمكن نلاقي بعد ايام ناس اخدت اعدام على خلفية اهانة الذات العسكرية و البقاء لله..
تفتكروا من المستفيد من الموجودين حاليا في الساحة السياسية من الفوضى الهدامة الموجودة حاليا ؟؟
تفتكروا مين الوحيد اللي الثورة لم تطالب بمحاسبته و المبادرة بسؤاله منم اين لك هذا؟؟
و تفتكروا من الوحيد اللي لسه خايف السيل يطوف و يكون الدور عليه و يتشال؟؟لو عرفتم تجاوبوا على الاسئلة يبقى اكيد انتم فاهمين المجلس بيتصرف معانا كده ليه ...و ماحدش يتوقع ان الاعتصامات و المسيرات ممكن تغير في موقفهم حاجة لانهم الاقوى دلوقتي ..و خاصة بعد التاييد القوي ليهم من ناس كتير في الشارع مصالحها اتعطلت او محلاتها اتكسرت او بشاعتها بارت و كسدت تجارتها ..
و ارجوكم ما حدش يلوم ع الناس دي لان اللي ما يعرفش يقول عدس..
انا اللي عاوزاه دلوقتي اننا نتخلى عن اي طلبات لينا امام المجلس لانه مش ح ينفذها و ننسى محاكمة رموز الفساد لان هو احدهم و كل قيادات البلد في الستين سنة اللي فاتوا كانت من المؤسسة العسكرية ..
و الاهم اننا نركز على عدة محاور :
اولها : المحاكمات العسكرية للمدنيين . و حق كل انسان للاحتكام امام قاضيه الطبيعي و ان يحصل على حقه في الدفاع عن نفسه كاملا غير منقوص ..حتى لو كان بلطجي مكانه مش سي 28 يا جدعان ..ده حتى السجن درجات و كل متهم عقابه على قد جريمته..
ثانيها : تكوين لجان شعبية لمراقبة اداء الوزارات المختلفة لان ما فيش مجلس شعب
ثالثا : الرقابة على موارد الدولة حاليا و متابعة اوجه صرفها اولى من البكاء على اللبن المسكوب و الجري وراء الاموال المنهوبة و المهربة
رابعا :حملات توعية سياسية و ندوات على مدى واسع و هي ليست لدعم احد يعينه و لكن لتوعية الناس بكيفية تمييز الجيد من الردئ في المرحلة المقبلة و ان من يعطيك سنارة و يعلمك الصيد افضل بكثير ممن يعطيك كل يوم سمكة ليظل ابد الدهر متحكما بك عن طريق سيطرته على قوت يومك الذي لا تملكه..
خامسا : حملة الدين لله و الوطن للجميع و هي تركز على مفاهيم مثل الاخلاق لا دين لها و الدين اقدس من ان يتخذ شعارا و الدين منهج و طريقة يطبقها الفرد فيصلح المجتمع و ليس قوة اواوامر تفرض بقوة القانون.
سادسا : مجلس الى الامام و ثورة ثورة حتى النصر و تفعيله ..فالثورة كانت على الجهل و الظلم و الفقر...طيب فين الناس ؟؟
فين الشغل ؟ ما فيش حد عاوز يبدا ليه ؟؟ لازم كلنا نفهم ان مشكلة البلد دلوقتي هي الخراب اللي معشش في العقول عشان كده العقول الخربة دي لازم تكون اول حاجة نشتغل عليها ..
اذن مطلبنا الاول تعليم جيد ..و عشان العقل السليم فقي الجسم السليم يبقى الصحة و التامين الصحي هو المطلب الثاني و المطلب الثالث و الاهم التكافل الاجتماعي يا جماعة ...ارجوكم ما حدش يقول لي لو ربنا عاوز كان اداهم ..ربنا خلقنا درجات ذكي و محدود الذكاء..واحد وارث و وواحد ابوه كان على باب الله و ما سابلوش الا الستر ..يا ريت كل اللي ربنا كارمه بحاجة زيادة شوية عن اخوه يتبرع بيها و انا لا تكلم عن العطاء المادي فقط انما العطاء بجمبع اشكاله ..يهني من الاخر المليان لازم يكب على الفاضي ..عارفين ليه ؟؟
لانه ما نقص مالا من صدقة و لان في ملكين بيقولوا ع الصبح كده اللهم اعطي منفقا خلفا و اللهم اعطي ممسكا تلفا و اكتر من كده حابقى باشحت على ناس مش عارفاهم ...
المهم و بعد كل ده حد فاهم حاجة ؟؟؟و لا من انتم ؟؟
و اللي يقرا يشير في الخير يمكن الكلام يسمع من له قلب و عقل
ليست هناك تعليقات:
إرسال تعليق