الانتخابات بكرة يا جدعان..!!

مش قادرة اصدق ..بجد ..من أسابيع بامشي في الشوارع و أتفرج علي التوك شوز ..هو اللي حاصل ده حقيقي؟؟ شيء لا يصدقه عقل ...و كانه حلم اننا في مصر ..بلد عربي مسلم ..و عندنا عدد من المرشحين لرئاسة ليست اي رئاسة ..انما رئاسة مصر ..ام الدنيا..الدولة الرابعة علي مستوى العالم من حيث تعداد السكان المسلمين و الرابعة عشر من حيث تعدادها عامة..بلد الهلال و الصليب ..بلد الأهرامات و عرائس النيل..تفتكروا بلد بهذا الحجم ممكن اي حد يحكمها؟؟او يقودها او يكون قديرا في الإمساك بزمام أمورها؟؟ اعتقد في ناس كتير من قبل الانتخابات ومن الواضح جداً انها اكبر منهم بكثير..و ناس تانية بلغوا من العمر ارذله و محتاجين يأخذوا حقهم في الراحة فقط ليس الا..و ناس تانية لها شعبية و عندها فكر اتمنى لو لم يحالفهم الحظ بالنجاح الا ينساهم سعيد الحظ و يستفيد من خبراتهم في شتي المجالات و يتذكر ان خير من استخلفت القوي الأمين ..و كل اللي بيزعم انه سينتهي فلول النظام و أذناب مبارك و دلاديله بحجة انه ليس أمامنا الا هم !! أقوله اذا انت شايف نفسك مش راجل و لا قد المسؤولية انت حر و لكن أذكرك بقول من لا ينطق عن الهوى بان الخير باق في أمتي الي يوم الدين ..و بان هؤلاء الشراذم الباقية من حكم اللامبارك هم الادرى بشؤون البلاد فكلامك مردود عليه : هي كانت بلاد اصلا؟؟ دي كانت أبعادية أبوهم و إحنا فيها عبيد و لو عاوز أسياد سهل جداً ادينا جمعناهم لك في مكان واحد ..روح لهم هناك ع الكورنيش بعد المعادي بفركة كعب..
اللهم وفق أبناء هذا البلد لما تحب و ترضى فانت تعلم و نحن لا نعلم..اللهم اهدنا للخير و الحق يا رب ..اللهم لنصرنا علي القوم الظالمين..اللهم رد كيدهم في نحورهم و اسمعونا آمين :)

حركة مصرنا

المشروع الأول: احمِ ثورتك -
'via Blog this'

المشروع الأول للحركة: احمِ ثورتك

مقدمة:

الثورة المصرية هي ثورة شعب قام وانتفض ضد سنوات من القهر والفساد والدكتاتورية، ولم تكن هذه الثورة لتنجح في تحقيق أول أهدافها في إسقاط رأس النظام إلا بعد أن انضم الشعب إلى الشباب الذين بادروا بالنزول في 25 يناير وآمنوا بشرعية مطالبهم وأهميتها في تحقيق نهضة هذا الوطن. إلا أن هناك حربا إعلامية تُدار بشكل مُتقَن لمحاولة عزل الشعب عن ثورته ومقايضته بين أمنه وحريته، واقتصاده وكرامته، واستقراره ونهضته ويقوم بهذه الحرب الفكرية كل من له مصلحة في إعادة استنساخ النظام القديم في ثوب جديد يضمن لهم أن يأمنوا العقوبة وأن يستمروا في فسادهم. ولذا كان من الواجب علينا جميعا ألا نكتفي بالحديث مع أنفسنا بل توجب على الجميع أن نكون سفراء لهذه الثورة حاملين دعوتها السلمية إلى كل المصريين، مدافعين عنها ضد ما يُثار من إشاعات مضللة، ومبادرين باقناع الشعب بأهدافها النبيلة التي لم تتحقق على أرض الواقع حتى الآن، ومنادين بانتهاء الحكم العسكري لمصر والذي استمر لأكثر من ستين عاما.

الهدف:

أن يقوم كل عضو من أعضاء حركة مصرنا بدوره في حماية الثورة باقناع من حوله في الإنترنت والشارع سواء في المنزل أو العمل أو الجامعة أو المسجد أو الكنيسة بأهداف هذه الثورة والرد على ما يُثار ضدها من إشاعات بغرض تشويهها.

مدة الحملة:

من الآن وحتى 25 يناير القادم

الرسائل:

1. التذكير بمطالب الثورة: عيش - حرية - عدالة اجتماعية - المحاكمات العادلة
2. الثورة لم تحكم وأن المجلس العسكري هو المسؤول عن وضع البلاد الأمني والاقتصادي من فبراير ٢٠١١
3. مطالب الثورة السياسية هي تسليم إدارة الدولة بشكل كامل إلى سلطة مدنية ينتخبها الشعب (رئيس ومجلس شعب)
4. الرد على الشائعات وحملات التشويه التي تروّج أن الثوار يرغبون في إسقاط الجيش والشرطة لإسقاط الدولة وتقسيمها
5. الرد على الشائعات التي تعتبر الثورة مؤامرة أجنبية وأن الثوار مجموعات تعمل لصالح دول أجنبية
6. الرد على قضية أن الاعتصامات هي التي تتسبب في الاضرار بالاقتصاد وأن الثوار يستهدفون المنشآت الحيوية
7. الإشارة أن التغيير الحقيقي لم يطل المؤسسات الأمنية وأنها تتصرف بنفس عقلية ما قبل 25 يناير
8. سلمية الثورة هي الضامن لتحقيق أهدافها دون أن نضع أبناء مصر في مواجهة يخسر فيها الجميع
9. ‎ غياب العدالة وتأخرها في قضايا قتل وتعذيب المتظاهرين هي أحد أسباب الاحتقان الحالي
10. التصرفات السلبية لأي فصيل أو شخصيات محسوبة على الثورة لا ينبغي أن تُحسب على الثورة وجميع المؤمنين بها
11. الثورة حققت العديد من المكاسب التي كانت تعد مستحيلة منذ سنوات طويلة وحمت مصر من كارثة التوريث
12. التعريف بالنماذج الثورية التي ضحّت بحياتها من أجل حلم التغيير وأهمية متابعة ملفات المصابين وأهالي الشهداء

الوسائل:

1. لأصحاب المواهب: كتابة المقالات، تصميم الشعارات، الكاريكاتير، والأفلام القصيرة التي توصل هذه المعاني
2. نشر هذا المحتوى عبر مختلف المواقع والمنتديات لأكثر من 15 مليون مصري على الإنترنت
3. طباعة ما يُنشرعلى صفحة الحركة على الفيسبوك وتوزيعها في نطاق العمل والسكن والدراسة لتوسيع القاعدة الإعلامية
4. مشاركة أصحاب الرأي من أعضاء الحركة في ندوات جامعية وثقافية في مناطقهم للحديث عن الثورة ومطالبها
5. تنظيم مسيرات سلمية ومنظمة في مختلف المحافظات تُصحح الصورة الذهنية المرتبطة بالثوار ومطالبهم
6. دعوة الآخرين للاشتراك في حركة مصرنا لتوسيع قاعدة المشاركة في الحركة

كيف تبدأ؟

تابع صفحة الحركة على الفيسبوك وسترى تباعا في الأيام القادمة مجموعة من الاقتراحات التي نرجو أن تساهم معنا في تنفيذها وتشاركنا جميعا ثمراتها. وإذا كنت من أصحاب المواهب وقمت بإعداد محتوى يناسب الرسائل السابقة فأرسل لنا المحتوى الذي قمت بإعداده على: talents@masrena.org

بانتظار مشاركتك .. لا تعتمد على غيرك .. فدورك في حماية الثورة والتأكيد على سلميتها والعمل على تحقيق أهدافها هو واجب وطني

إن لم يكن من أجلنا فمن أجل أبنائنا .. بسم الله نبدأ

انت تحمون ملكا زائلا

اخر بوست كتبتها اتكلمت فيها عن حوار مع احد افراد المؤسسة العسكرية المصرية و سردت فيه بعض ما جاء به و كنت ناوية اكمله و لكن الاحداث المتلاحقة منعتني من الكتابة ..و هي ليست متلاحقة فقط و لكن مأساوية ايضا ..

من المخزي ان يتقاتل ابناء الوطن الواحد ..الاخ امام اخيه ..و من اجل ماذا ؟من اجل ملك زائل ..كلنا راحلون و الكفن مالوش جيوب و الدفن في لحد تحت الارض و الحساب امام رب واحد لا يشفع لديه مال او جاه !!

و لكن ..الاهم من ذلك ما يحدث منا نحن و ليس هم ..اصرارنا الغريب على عدم الالتفاف حول اي قائد ..

عدم توحيد المطالب ..

الاعتصامات اصبحت لا تمثل مطالب - فئوية كما يقال- و انما تحولت الى صداع لرجل الشارع العادي و للثوار ايضا فنحن حتى لو كنا ضد الاعتصام في هذه المرحلة الحرجة .. انما نحن قلبا و قالبا ضد اي محاولة لفضه بالقوة و الاعتداء على من فيه طالما استمر في سلمية و هدوء و بلا اي استفزاز لمشاعر الاخرين الذين قد لا يرون المعتصمون اصحاب حق..

و كانت الانتخابات و نزلنا كلنا وقفنا في الطوابير في عز البرد و المطر و انتخبنا في هدوء و لم يهزنا المخالفات العديدة من بعض الفصائل او يهد من عزيمتنا سيطرة فصيل واحد على المشهد الانتخابي الذي لم نحلم ان نصنعه كما صنعناه ..

و كانت النتائج التي توقعناها و لم نرض عنها بيننا و بين انفسنا لوعينا الكامل ان مخططات التجهيل الممنهج التي مورست ضد الشعب من عشرات السنين و سلبه الحق في تعليم افضل ينهض بعقلية المواطن ثقافيا و اخلاقيا و دينيا و يرتقي بفكره..

كل هذا ساهم في ما نشهده الان من تدين مظهري و سيطرة لرجال دين مزيفين - لم يكن احدهم يوما ذو علم حقيقي - على الغالبية العظمى من بسطاء الشعب و ابناءه العاديين ..

و ساهم في ذلك ايضا قرار المجلس العسكري بالدعوة الى انتخابات برلمانية عاجلة لم تتح الفرصة  امام جميع الفصائل لتعيد ترتيب اوراقها و حشد صفوفها و مريديها لتمثل المجتمع المصري بطوائفه السياسية تمثيلا حقيقيا..

و اللي ح يقول لي ما هي طلعت احزاب و نجحت ..ح اديه بوكس في خلقته لان الاحزاب ما هي الا انتماءات سياسية و ايدولوجية و ليست عقائدية و دينية لان باختصار لو الموضوع كده بقت سهلة جدا حزب كبير مليان مسلمين و حزب اخر مليان مسيحيين و وقتها الخلاف محسوم حول من ستمثل مصالحه على اكمل وجه في البرلمان ..اللي حصل ان اكثر الفصائل ترتيبا و توافقا على مبدا معين هي اللي عرفت تعمل احزاب ناجحة و ما حدش يزعل تاني من اللي ح اقوله السلفيين عملوا حزب و دخلوا اخوة اقباط و هما بياسسوه عشان لجنة الاحزاب توافق عليهم انما بعد ما بداوا الانتخابات و الشغل الحقيقي طردوهم برة و اللي تم تصعيدهم و ظهورهم و توليهم مناصب قيادية جواه مش مسلمين لأ..!!  سلفيين وبس !!! لحى فقط ..انظر للدعاية الانتخابية و لا ارى الا اللحى و لا حول و لا قوة الا بالله

و النساء على ذيل القائمة حتى يتم اقصائهن اوتوماتيكمو عشان النسبة و اللي كلنا عارفين ان مافيش حزب ح ياخدوا كل اعضاءه الا لو جاب مية المية ..و الاخ المهندس ساويرس لما عمل حزبه عمله لكل المصريين فعلا و لكن بقي الحزب امام العامة مسيحيا يضم المسيحيين و سمعته في الشارع كده و اللي مش مصدق ينزل يسال في الشارع مش ح يسمع غير حزب ساويرس ..

الاخوان لن اتحدث عنهم لاني من زمان باقول و باذن في مالطة انهم جماعة سياسية و لا اغراض دينية لديها انما هم يستخدمون شعارهم المطاط الاسلام هو الحل كي يستقطبوا اصوات الناخبين من بسطاء الناس لانهم باختصار بيقولوا لا اله الا الله يبقوا ناس كويسين ..

عارفين اللي مضايقني ؟؟؟ان احنا بجد شعب مسكين ما فيش حد عاوز يتقي ربنا فيه ..

الاهم من ده كله المشهد واضح انتخابات و تصويت و نتائج و كله عال ..البلطجية اختفوا لان اليد المحركة لهم توقفت و كانت مشغولة في الانتخابات و طبعا كله فاهم الكلام على مين و ما حدش يشتم ..بس ادعوا و قولوا اللهم رد كيدهم في نحورهم ..اللهم اضرب الظالمين بالظالمين و اخرجنا من بينهم سالمين . فالدعاء سلاحنا و الشكوى لغير الله مذلة 

نيجي باه لكواليس هذا المشهد افتكروا المرحلة الاولى من الانتخابات اللي في اخر التصويت و وقت الفرز حصل فيها اشتباكات في التحرير و ضرب و مولوتوف و قيل وقتها ان دول الباعة الجائلين و المعتصمين..

و المرحلة التانية اللي وقتها كان الاعتصام انتقل لمجلس الوزراء ..هل دي اول مرة يحصل فيها احتكاك بين الشعب و الجيش ؟؟و هل فعلا هما مش عاوزين الوقيعة دي؟؟طيب بما تفسر عدم انسحاب الجيش من اي مواقع اشتباكات زي ما عمل قبل كده في كذا جمعة ؟

الاهم من ذلك الاتجاه العام كان ان ح يحصل تصعيد من القوى الثورية لعدم رضاهم عن نتائج النتخابات لانها لا تعبر عن واقع الامر باي شكل من الاشكال ..طيب القوى الثورية و السياسية سكتت و اتخرست و احترمت راي الاغلبية ..و البلد ماشية و الحال عال رغم وجود الاعتصام ..و على فكرة صديقي العقيد .أ.ح كان تعليقه على ارتضائنا نتائج النتخابات كالتالي و بالحرف و الله على ما اقول شهيد : يعني انتوا عاجبكم الاراجوزات اللي بدقون دول يمسكوا البلد و احنا لأ؟؟ رديت : ايوة طالما الشعب اختارهم!! فكماكان منه الا ان ثار قائلا : الجيش اكثر مؤسسة منظمة في البلد دي و لو ما مسكش البلد دي ح تضيع و كلكم ح تشحتوا و مش ح تعرفوا تمشوا بعد كده في الشوارع ..ردت عليه قائلة : انا معاك ان اللي ب تقوله ده صح و دي حقيقة لا ننكرها بس فرق كبير بين الادارة و السياسة لما بتتعامل مع المجندين فدول فصيل واحد يربى على الطاعة العمياء و تنفيذ الاوامر حتى لو غلط و نفذ ثم تظلم ..و عنده استعداد للتضحية بروحه بلا خوف لنه عارف انه ح يموت عشان هدف ..انما هذا الاسلوب لن يفلح مع المدنيين ..لاننا باختصار لسنا فصيلا واحدا بايدولوجية واحدة و عقيدة واحدة و هدف واحد كاي رجل عسكري ..لن ينجح هذا مع شعب باكمله ..فبدا كلامي مقنعا مما جعله يرد باي عبارات هجومية تدل على اننا جيل فاشل ضايع ناقم على اباءه و اجداده و ناكر لافضالهم عليه ..هذه العقلية و هذا الرد كفيل بتوضيح الوحشية التي تعامل بها الجيش مع المعتصمين في الايام الاخيرة .و دفاعهم المستميت عن جنرالاتهم المجرمين السفاحين في محاولة لتكوين راي عام يقضي بان يستمر العسكريون في حكم البلاد و من يتوقع ان يتقبلوا وجود سلطة مدنية في البلاد و قوانين و دستور يجعلهم تحت طائلة القانون و ليسوا فوق المسائلة بيحلم اقراوا عن محمد نجيب اول رئيس لمصر الجمهورية و ما قاله عن الضباط الاحرار وقتها و انتم تفهموا..عامة كل ما يحدث ترهات ..

الاهم حاليا ان تتوقف تلك المهاترات و تنتهي الانتخابات و يكون عندنا مجلس شعب وساعتها يكون كفاحنا من اجل اختيار اللجنة التاسيسية للدستور بموافقة الشعب كله و ليس البرلمان وحده او المجلسي العسكري و مؤسسات الدولة التي مازال يسيطر عليها رجال المخلوع و نظامه القذر فالثورة تخلصت من راس الافعى فقط و لكن جسدها مازال متوغلا في جميع انحاء البلاد.. في موظفي الصف التاي و التالت في كل المصالح الحكومية و الوزارات ..

و مش مهم موقفنا نحن من الاعتصام ..المهم راي الاغلبية ..لا نريد ان نخسر سلاح الضغط الوحيد لدينا ..المجلس لا يريد انهاء الاعتصامات لانه باختصار لديه من الرجال و العتاد ما يجعله قادرا على ذلك انما هو يريدها حرب استنزاف تستعطف الشعب عن طريق احتكاكات توقع خسائر من الطرفين - و معروف الخسائر الاعلى فين طبعا بين ناس لابسة مدني و ناس لابسة خوذة و ماسكة درع - و يستغلها الجيش لكسب المزيد من التعاطف و التاييد لبقاءه في الحكم بحجة القضاء على الفوضى التي يديرها هو باقتدار..

هو احنا شكلنا وحش اوي كده؟؟

منذ فترة ليست بالطويلة و لا بالقصيرة التقيت باحد اعضاء المؤسسة العسكرية

و تبادلنا اطراف الحديث و تنوع ما بين شد و جذب ومناورات و مناوشات لتلافي اعلان وجهة النظر واضحة صريحة رغبة في الابقاء على جو لطيف و لان الاختلاف في الراي لا يفسد للود قضية ...

و الحق يقال الراجل سمعني للاخر و ما قاطعنيش بتاتا ..و لما سكتت روبي هانم عن الكلام سالني و قال لي خلصتي يا رؤى هانم؟؟

فرددت عليه :خلصت مبدئيا يا حضظابط..فقال لي ماشاء الله عليكي ..تتحلين بقدر عال من الانصاف و كلامك لا يخلو من الهجوم على اشخاص بعينهم و ربما رميت بعض الناس بتهم هم منها ابرياء و لكنه لا زال يخلو من التجريح ..

فقاطعته :سعادتك انا ضد مبادئ و لست ضد اشخاص..خاصة اذا كنت لا اعرفهم شخصيا و لكن اذا كنت ضد مبادئك فقد توصلت اليها و استنتجتها من تصرفاتك ..

رد مقاطعا : ربما او اكاد اكون شبه متاكد انك اسات الفهم او التفسير و ربما جانبك الصواب في استنتاجاتك .

و كان ردي : طيب ممكن اسالك سؤال ؟

رد بهدوء: اتفضلي 

انا : هل يطمع الجيش في حكم البلاد؟

رد بلا تفكير : و من غيره يصلح ؟؟انتي عاجباكي الفوضى اللي احنا فيها و قلة الادب و العيال السفلة اللي كل يوم عمالة تشتم و تقل ادبها على ناس اكبر منها سنا و خبرة و عقلا ؟؟

رددت : و هل يكون الرد على طيشهم اعتقالهم بلا تهم معقولة و القاءهم في سجون الحربية بدلا من سجون الداخلية ؟؟

فقال : زي مين مثلا ؟

انا : زي مايكل نبيل .علاء عبد الفتاح .اسماء محفوظ و 12 الفا من شباب البلد في السجون و لا اعرف اسماءهم جميعا

فثار : دي عيال قليلة الادب و ما شافتش رباية والسنتهم عاوزة قطعها و اللي يحكمني عليهم ...بس هاتوا هم لي..و البنت التانية دي اسمها ايه ..عقبت : اسراء عبد الفتاح ؟

فرد : ايوة الهانم العيلة اللي راكبة عربية بي ام دبل يو و ساكنة في التجمع الخامس..كل شهر بتسافر امريكا..

قلت له : اللي انا اعرفه من متابعتي لاسماء ان السبب اللي تم استدعائها من اجله هو انها قالت اذا ما فيش عدالة ما حدش يزعل لو طلعت ناس مسلحة و قامت بسلسلة اغتيالات و كلام كده ..

فرد : معاكي انها ممكن تكون ع النت مش بتشتم انما في الشارع اقفي اسمعيها ..منتهى قلة الادب و السفالة 

فكان ردي : هو قلة الادب و السفالة القانون يعاقب عليها ؟؟

فسكت و شعرت ان سؤالي مستفز و انه فهم منه اني معتادة على قلة الادب و السفالة فعقبت و قلت اذا كان اي حاكم سياسي يوجه له النقد فما مشكلة السادة اعضاء المجلس في تقبل النقد؟؟

فرد: المشكلة مش النقد المشكلة انهم بيتطاولوا على السيد المشير شخصيا ..

و سالته : ما شاء الله حضظابط متابع .فقاطعني : عميد يا انسة و بعدين ما هي الشتيمة و قلة الادب و العيال اللي اقل ما يقال عنهم انهم و لاد كذا و كذا و كذا (هو اقل كده فعلا لم يتلفظ باي لفظ خارج ) مش بتستخبى و بيتباهوا بيها و الفيديوهات في كل حتة

فقلت له : طيب انت شايف ان اللي بيقولوه مش صحيح؟؟ ما تعليقك على فضيحة كشوف العذرية ؟؟

رد قائلا ك كشوف العذرية كانت محاولة لنفي تهم التحرش بهن و الاعتداء على اي منهن جنسيا ..يعني انتو بتقولوا انكم اتاخدتم و اتقلعتوا هدومكم و اتعمل فيكو كذا و كذا يب تعالوا ورونا باه كذا و كذا 

رددت في هدوء : اذا كنت انت المشكو في حقه ..هل تقع عليك عتبات الاثبات او النفي ام انك من الواجب ان تجد جهة اخرى للتحري عن دقة هذا الادعاء !! الخصم و الحكم سبحان الله

فقال: ما انتوا بتشككوا في اي حد دلوقتي و اصبحتوا انتوا الوحيدين الشرفاء و اللي بتفهموا 

انا : مبدئيا انا عاوزة افهم مين انتوا ؟؟هو ليه فيه احنا و ليه في انتوا ؟؟ليه مش بتقول كلنا ؟؟

دي حاجة..

 و بعدين انا لما عرضت وجهة نظري على معاليك اعترفت ان البلد كانت كذبيحة و كلنا ايدينا متسخة - و لا مؤاخذة - بدمها ..يعني انا اقر باشتراكنا جميعا في ما كان يحدث و اننا جميعا مذنبون سواء بالصمت او الفرجة او نيل قطعة من اللحم ..

فاسقط في يديه و سكت ..

و للحديث بقية اكمله فيما بعد لاني لازم انزل ناو عندي مواعيد مهمة

انا يا اسرائيل ..

صباح الخير عليكم جميعا من زمان ما كتبتش مع ان جوا دماغي بركان افكار و كلام و حديث بس المساحة اللي كنا زمان لا نحصل عليها للنقد و توضيح السلبيات اصبحت الان للهجوم و الشتيمة و قلة الادب

 و اطلقت الثورة طاقات كامنة من القباحة و قلة الذوق لم نكن نعهدها و استغربها في شعب طيب متسامح زي الشعب المصري ..

عامة النهاردة الموضوع كبير و انا فرحانة على راي اللي بيقولوا فرح التنين ..

عارفين ليه ؟؟عشان زلزال تركيا ..

لا لا ماحدش يفهمني غلط ..

http://www.boston.com/bigpicture/2011/10/the_turkey_earthquake.html

انا حزينة من اجل اخواننا في البشرية و الانسانية و بني ديننا في تركيا و عوضهم الله فيما نكبوا فيه و صبر قلوب كل من مات له حد في الكارثة دي ..

بس اللي فرحني النهاردة ع الصبح كده خبر قريته في العربية عن طائرة مساعدات اسرائيلية لمنكوبي الزلزال في تركيا

http://www.alarabiya.net/articles/2011/10/27/173987.html

المهم تعالوا بقى نقرا اللي بين السطور او زي ما بيقولو وراء الكواليس و عشان نفسر اللي بيحصل ده

نرجع فلاش باك كده و نشوف كان ايه رد فعل اسرائيل على مقتل جنودنا ع الحدود ؟؟

الاول ناسف لقتلاكم ..و بعدها و بعد اعتصام السفارة فتحوا تحقيق

 و ما سمعناش عنه حاجة لحد ما حصل الاقتحام - و انا لست مع اقتحام السفارة طبعا و لو ان مشاعري تضاربت وقتها- و ساعتها سحبوا السفير وده كان خوفا عليه و ليس احتجاج على ما حدث بشكل او باخر

فهم اذكى من اي تصعيد ليس في مصلحتهم في الوقت الحالي ..

و ظهرت نتائح التحقيق و بعدها اعتذار رسمي و يمكن بقليل من الضغظ يكون في تعويضات لاسر الضحايا او ان ده حصل و ليس لي علم به فانا لست متابعة الاحداث بقوة لظروف خاصة ...طيب 

تعالوا كده و افتكروا تصريحات اوباما الاخيرة بخصوص اسرائيل لما قال اصدقائنا و مش ح نسيبهم لوحدهم في اول موقف معلن له من ابناء العم؟؟و احنا اللي كنا فاكرينه نصير القضية الفلسطينية ؟!؟؟!!!

http://www.opendemocracy.net/article/barack-obama-israels-true-friend

http://www.ekhbaryat.net/internal.asp?page=articles&articles=details&cat=3&newsID=30754

http://www.youm7.com/News.asp?NewsID=497395

http://www.alarab.net/Article/379174

طيب عشان اللي ليه شوق في حاجة يقولها و يفوق من الوهم و يعرف ان ما حك جلدك مثل ظفرك !!هو مين يا عم ينصر العرب و المسلمين اذا كانوا هما اصلا متشرذمين و عاوزين اللي يجمعهم على قلب رجل واحد ..ااااااه ح نقول ايه باه ؟؟ما يقدر ع القدرة الا ربنا

طيب كل ده ما يخليش اي واحد عنده مخ و فيه ذرة عقل واحدة يربط بين كل ده و يوصل لنتيجة ؟؟

اكيد انا لوحدي على الاقل وصلت لنتيجة 

ان اسرائيل وحيدة في المنطقة 

و انها حاسة بعد اختفاء الانظمة العربية المستبدة واحدا واحدا - و التي اتت بها اصلا امريكا في انقلابات عسكرية - اصبحت وحيدة 

و ان عدوي اللي في البيت اللي جنبي ممكن ينفع عن قريبي اللي في قارة تانية و بيني و بينه الاف الاميال 

و ان النووي اللي عندي لو فكرت استخدمه ضد اي دولة من دول الجوار فانا - كاسرائيل - ح اكون اول واحدة تكتوي بناره 

و ان الكيان اللي لا يقهر ما هو الا قط صغير مشاكس لو شخطت فيه شخطة ح تسجده 

طيب الى اصدقائي بتوع الاستكرار  و سيبوا الجيش عشان المؤامرة الخارجية و هجوم الترمينيتورز و كائنات المجرة اللي بعدنا بعشر الاف سنة ضوئية رايهم ايه ؟؟

لسه مرعوبين و هارين على نفسهم و بنطلوناتهم مبلولة خوفا من اسرائيل اللي مش عارفة تحتل دولة بحجم فلسطين و خلاص باه حتستصيع و تيجي تحتلنا احنا؟؟

لك هيبة ملك

اتكعبلت في شوية صور كده و قلت لما اتكلم عليهم

و اهو نكسر حدة الاحداث المتلاحقة

بس قبل ما اتكلم عن معرفتي القليلة و القريبة بجزء من تاريخ حكام مصر

احب ابدي اعجابي بهذا الرجل اولا

هيبة ملك فعلا

و صورة تدرس في الكتب !!! اين نحن من هؤلاء العظماء ؟؟

هذا هو الملك فيصل ملك السعودية و هنري كيسنجر

الاول في قمة الاباء و الاسى في ذات الوقت و الثاني اتى صاغرا مترجيا بعد ان اوقف الملك فيصل ضخ البترول في عام 1973 و حينما سال كيسنجر الملك عن ما يريد رد –عليه رحمة الله- و قال :
زوال اسرائيل

و ذكر كيسنجر فيما بعد في مذكراته عن لقائه مع الملك فيصل في جدّة عــــام 1973 م محاولا اثناءه عن وقف ضخ البترول انه فاتحه الحديث قائلا :
" إن طائرتي تقف هامدةً في المطار بسبب نفاد الوقود , فهل تأمرون جلالتكم بتموينها ، و أنا مستعدٌ للدفع بالأسعار الحرة"
يقول كيسنجر : فلم يبتسمْ الملك !
بل رفع رأسه نحوي , و قال :
" و أنا رجل طاعن في السن ، و أمنيتي أن أصلي ركعتين
في المسجد الاقصى قبل أن أموت ،
فهل تساعدني على تحقيق هذه الأمنية ؟!

في الساعة 21 : 6 مساء يوم 26 يوليو 1952 غادر فاروق ملك مصر آنذاك قصر رأس التين بالإسكندرية مرتديًا لباس أمير البحر على ظهر اليخت الملكي المحروسة
وكان في وداعه علي ماهر باشا والسفير الأمريكي وأخواته الأميرات فوزية و فايزة
وأطلقت المدفعية21 طلقة تحية له..
وقد وصل اللواء محمد نجيب متأخرًا وذلك بسبب الازدحام ورافقه أحمد شوقي وجمال سالم وحسين الشافعي وإسماعيل فريد ولحقوا بالمحروسة في عرض البحر وذلك حسب ما ذكره اللواء محمد نجيب في مذكراته.
وخلال اللقاء لاحظ أن جمال سالم يحمل عصاه تحت إبطه فأمره قائلًا
"أنزل عصاك أنت في حضرة ملك"
مشيرا إلى ابنه الرضيع الملك أحمد فؤاد الثاني.

و لقد قابلت الرجل الذي اشار اليه فاروق منذ شهور و فعلا تشعر في وجوده انك في حضرة ملك..

أما عن هذا الشيخ الطيب فهو اللواء محمد نجيب اول المناضلين ضد العسكر و قدوتنا دائما و ابدا

اللي قال لهم احنا لازم نسيب السياسة لاهل السياسة و نرجع تكناتنا لاننا مش سياسيين و لا حكام احنا جيش مصر

وعندها انقلب عليه الضباط الاحرار و حبسوه في منزله لمدة ثلاثين عاما حتى مماته و شطبوا اسمه من كتب التاريخ كاول رئيس للجمهورية و يقال انه كان ممنوعا من الخروج و انه منع حتى من رؤية اقاربه و كان بدون خدم و كان يغسل ملابسه لنفسه و مات هكذا بين كتبه دون ان يعلم احد بوجوده..رحمة الله عليه

دول باه اللي خربوها و قعدوا على تلها

الى اليمين :
جمال عبد الناصر : هو ثاني رؤساء مصر.
تولى السلطة من سنة 1954، (بعد أن عزل الرئيس محمد نجيب، الغلبان اللي في الصورة اللي فوق )إلى وفاته سنة 1970. وهو أحد قادة ثورة 23 يوليو 1952
الى اليسار :
معمر القذافى : عسكري ليبي وقائد ثورة وحاكم ليبيا اللي ح ينخلع باذن واحد احد و بيحكم البلاد من 1969.
و صاحب أطول فترة حكم لليبيا منذ أن أصبحت ولاية عثمانية سنة 1551.

وفي ذات الوقت، تعد سنين حكمه للبلاد التي طالت نحو 42 عاما هي أطول سنين حكم لحاكم غير ملكي في التاريخ.

و دول باه الي جابوا ضلفها

اللي في النص : الرئيس الراحل محمد انور السادات
ثالث رئيس لجمهورية مصر العربية في الفترة من 28 سبتمبر 1970 وحتى 6 أكتوبر 1981.
و ده يا حيلة امه قتل غيلة

اللي ع الشمال : الرئيس المخلوع محمد حسنى مبارك:
الرئيس الرابع لجمهورية مصر العربية من 14 أكتوبر 1981، حتى أجبر على التنحي في 11 فبراير 2011.

الحزب و ما فيه و ما حوله و عليه

بسم الله و الصلاة و السلام على رسول الله 

ناس كتير اوي بتصرخ باعلى صوتها عشان محاكمة رموز الفساد و الحكم على اعضاء الحزب الوطني المنحل بحكم المحكمة بالحرمان من العمل السياسي لمدة خمس سنوات ..طيب ما نحرمهم للابد عشان اللي ضميره ميت مش بيصحى - مش لو بعد خمس سنين- ولو بعد الف عام....

اولا يا جماعة انا ضد التعميم في الحكم على اي حاجة فلكل قاعدة شواذ..و اذا حكمتم فلتحكموا بالعدل و العدل بيقول ان لو حاجة زي دي اتعملت ..في ناس كويسة و محترمة كتير اوي ح تتظلم و احنا كمان ح نتظلم باننا نخسرهم كوجوه معتادة و مشهود لها بالكفاءة و النزاهة و نظافة اليد و الذمة  في الشارع المصري سواء كان ريف او مدينة .

طيب ليه ؟؟و من غير ما نفهم ؟؟ يبقى احنا عملنا زي اللي كنا بنعايب عليهم و اخدنا الناس عاطل على باطل ..و ما حدش يقول طيب القيادات بس لان القيادات كمان كان فيهم ناس كويسة ..فاعلين و مؤثرين في اتخاذ القرار مش ده المهم و لكن يكفيهم شرفا انهم ما سابوش المركب تغرق و كان عندهم امل ان الحال ممكن ينصلح و ياتي الله بخلق جديد و دماء جديدة تغير واقع ما يحدث و قد كان و الشهادة لله واقعا مؤسفا مخزيا ان دل على شيئ فهو لا يدل الا على اننا جميعا قوما ظالمون لا ننصر الظالم و لا المظلوم 

و لا تخرج مننا جميعا كلمة حق -ترضي الله تعالى- لدى سلطان جائر و شهودي على هذا الاخوة السلفيين الذين استلموا جثة الشاب سيد بلال ضحية امن الدولة - على خلفية تفجيرات راس السنة - في منتصف الليل و دفنوها في العتمة كانه بيداروا عار و لم تتحرك الدماء في عروقهم و تغلي في رؤسهم و يطلبوا القصاص العادل ممن يتم طفله و رمل زوجته  ..

و قبل ان اكمل  لا تنسوا القاعدة المهمة ان لا نعمم حكمنا على طائفة معينة على جميع منتميها و مريديها و لنتابع سويا

ماهو الحزب الوطني و من هم اعضاؤه ؟؟

الناس في البلد دي ثلاث فئات : 

1- ناس اعضاء في الحزب .

2- ناس نفسهم يكون معاهم كارنيه الحزب 

3- ناس بره الحزب و مش عاوزين ينضموا له و دول بردو فئات و هم :

               1-ناس ما لهاش في السياسة  

               2- ناس قرفانة من اللي في الحزب و فاكرينه سبب خراب البلد

               3- ناس مش عارفة ان الحزب موجود اصلا 

نيجي باه للناس اللي جوة الحزب فعلا و عاوزين نقسمهم لان دول الاهم حاليا :

1- ناس كانت بتنجح في الانتخابات و عندها ارضية في الشارع و الحزب عارف ان مرشحه ح يسقط امامها في انتخابات نزيهة فدول كان الحزب هو اللي بيسعى لضمهم الى قاعدته 

2- ناس عاوزة تدخل المجلس و عضويته بالنسبة لها تغطية في بيزنس و خلافه و دول عرفوا من اين تؤكل الكتف و شعارهم الاول نفسي ثم نفسي و كانوا بيتلقحوا في الجلسة ودن من طين و وودن من عجين.

3- ناس مالهاش في لعبة الانتخابات و هي مجرد اصوات ممكن تكون تباع و تشترى و ممكن لا و الله اعلم.

4- ناس -ما حدش يقدر ينكر وجودها - كانت في الحزب فقط لتتمكن من مساعدة الناس اللي برة و دول اصلا في مواقع ممكن تعمل منها خدمات لناس كتير و تسهل حاجات كتير و الحزب و العلاقات اللي كونوها جواه ساعدتهم في اللي بيعملوه .

5- ناس يدعون المهمشين و دول اللي كان ليهم شعبية في الشارع و الحزب مش بيرشحهم عشان عنده اولويات اخرى و كانوا بينزلوا مستقلين .

و في تصنيفات اخرى كتير و لكن انا لخصت اهمها عشان ما اطولش عليكم ..الاهم من ده ان الحزب بالطريقة دي زيه زي اي مؤسسة ممكن نقول فيها الكويس و الوحش و المؤسسات ما هي الا افراد اذا ما صلح الافراد نهضت المؤسسة و قامت على اكتافهم و اذا ما فسدوا فسدت و انهارت فوق رؤوسهم ..

و ابدا هنا بالتلميح الى بداية النهاية للحزب كمؤسسة و التي بدات بظهور احمد عز مهندس التوريث و امراطور الحديد في مصر و الذي يقبع تحت سقف زنزانته في طرة حاليا و التي كانت ابرز ملامحها الانتخابات القاعدية التي بداها الحزب في صيف 2007 و كان الهدف منها - او كما كان مفترضا- ان الحزب ينسف رموزه القديمة و يصعد ناس جديدة و يغير الوجوه اللي الشارع عرفها و اللي شعبيتها قاربت عالصفر و بدات تهدد شعبية الحزب كله في الشارع ...و للاسف اتت الانتخابات بنتائج عكس ما هو متوقع لان الحزب نفسه كمؤسسة كان قد طالها من الفساد المستشري في كافة مؤسسات الوطن ما طالها و ظهرت فيه تكتلات الفاسدين في ابشع صورها و اتفقوا على الصعود على اكتاف الكثير من شرفاء الحزب - و ارجوكم ما حدش يشتم - لان بجد الحزب كان فيه ناس كتير كويسة بس ما كانوش في الصورة زي اخواننا البعدا و فيه ناس كتير بتخاف دلوقتي تشهد شهادة حق للناس دي عشان ما يتقالش عليهم ثورة مضادة و فلول نظام و الخزعبلات اللي احنا عايشينها من شهور ..

وبعد هذه الانتخابات القاعدية كانت تعديلات الدستور الخاصة بالية ترشح الافراد للرئاسة ثم تمريرها بحيث لا يستطيع الترشح سوى شخصين نعرفهما جميعا ..فكانت تلك مطرقة تدق اول مسامير نعش النظام باكمله و ليس فقط الحزب وقياداته و ظهرت الحركات المعارضة و المناهضة ككفاية و حزب الغد و مش عارف تنظيم ايه ضد التوريث و غيرهم و كانت الناس كلها بتخاف تعدي جنبهم او تقف معاهم في اي وقفة احتجاجية سلمية و الكلام ده من 2005 يمكن ..

و على فكرة عشان ما حدش يقول اني بافتي و ان الكلام ده كله تاليف احب الاول احدد موقفي من الثورة انا مع الثورة حتى النخاع و لكنني ضد تركنا للميدان يوم 11 فبراير و ضد تهليلنا للجيش يوم ما مبارك المخلوع سلمه البلد تسليم اهالي و مع المطالب الاصلية للثورة التي حادت عنها الان و اختزلها البعض في زيادة مرتبات و محاكمة شخصيات و دم الشهدا ..و ضد قطع الطرق و قفل الميادين فحتى التظاهر و الرفض و الاختلاف له ادابه ..التي يجهلها الاغلبية و يكابر البعض في انكارها و تناسيها .

و الكلام اللي قلته على الحزب ده انا مش جايباه من حد و لا سامعاه من حد بل شفته بنفسي و عشته بنفسي منذ اكملت عامي الثامن عشر و اصبح لي صوت انتخابي لاني من وقتها دخلت الحزب..نعم الحزب الوطني الديموقراطي و مش انا و بس ده انا و بابا و اخويا و خالي كان امين وحدة حزبية و خالي التاني كان امين دايرة وخال تالت كان عضو مجلس محلي و خالتي عضو مجلس مدينة...اكمل بقية اللستة و لا كفاية عشان اللي عاوز يشتم يشتم ؟؟

يا ريت باه كل الناس تسيبها من قصة الحرمان السياسي دي عشان ما يتحولوش الى زبانية الثورة زي ماكان النظام القديم بيعمل تمام و اقولهم حاجة واحدة بس .. و قل اعملوا فسيرى الله عملكم و رسوله و المؤمنون ..احسن من الندب و الهجوم على اي كائن لمجرد انتمائه لكيان فسد معظم افراده و اذا كان يجب ان نهاجم فلنهاجم انفسنا اولا لان الفساد المستشري في البلد مننا فينا و احنا كنا بنغذيه كل يوم بتهاوننا في حقوقنا و صمتنا المهين امامه و تمسحنا في جلادينا ..اعملوا حتى لا نتحول الي شعب من الجلادين و كلنا مشهرون سيوفنا للبعض