مين السبب في الفوضى

سؤال سهل جدا و في وجهة نظري كلنا ممكن نجاوب عليه و بسرعة

اللي حيرد و يقول غياب الشرطة و اللي حيرد و يقول الناس اللي في العشوائيات و اللي حيرد و يقول البلطجية و اللي حيقول المندسين و هناك من سيتهم الاخ المختل عقليا.. و للاســــــــــــف ما فيش حد حيرد و يقول الاجابة الصحيحة 

ممكن اقولها انا و انا عارفة ان كل الناس حتزعل مني و في ناس حتلفظ كمان و تفول حاجات ما لهاش لازمة السبب في الفوضى الموجودة حاليا بالإضافة للاحساس المتنامي بعدم الامان في ظل غياب رجال الشرطة -اللي انا مش عارفة هما حياخدوا راتب اخر الشهر على ايه-

احنا السبب في الفوضى و اعذروني على التشبيه الفج بس الناس البسطاء الفلاحين دول امثالهم مش بتخيب(دود المش منه فيه)

هو الموظف اللي كان بيطلع عيوننا و يشتر ي ايماننا و احنا واقفين امامه انتباه كان مين؟؟

من هولنده؟؟لا مننا و مصري و  مطحون زينا

الراجل اللي في المخبز اللي بيقفل الشباك قبل ما الطابور يخلص و الناس تروح من غير عيش منين؟؟من عند كوكي مان؟؟

برافوووووووو  .....مننا و مصري زيناو مطحون زينا 

سواق التاكسي في اي دولة في العالم تشاور له يقف و تركب و تقوله رايح فين و من اي طريق

عندنا باه السواق باشا ...اي و الله باشا ..تشاورله يقف بعيد و يرميلك ودنه بره التاكسي كأن صوتك حينتهك قدس الاقداس

تقوله المهندسين يقولك بس مش حاروح جامعة الدول..تقوله ماشي يقولك حتدفع كام..تقوله العداد يقولك اصل و فصل و في الاخر يا تخليك واقف يا اما نرجع لامثال الحاجة ستوتة الله يكرم اللي جابوها و تهين قرشك و لا تهين نفسك في المواصلات التانية

الباشا السواق منين؟؟

هو انا متاكده انه مصري و مطحون و غلبان زينا

(ايه ده هو الناس ليه كلها هنا زي بعض؟؟سندرس هذا فيما بعد)

لما الواحد يكون ماشي عكس السير يعني رونج يعني اتجاه معاكس يعني الشارع اتجاه واحد بس و ده ممكن 

بس اللي مش ممكن ان لما اللي جاي صح يتنح و يقوله ارجع مش حتعدي الاعلى جثتي عشان انت جاي غلط و ده طريقي ,تلاقي االناس اللي وراه عمالين يرجعوا عشان يعدوه و يمكن كمان يبدأوا بمهاجمته هو شخصيا و ترتقغ هتافات من نوع"يلا عم ..متبقاش حنبلي..سيبه يعدي ..عاوزين نخلص"

هو الاخ اللي جاي رونج.و الناس اللي عاوزين يسيبوه يعدي منين؟؟؟

الصراحة و بعد البحث و الدراسة وجدنا - و اسفين على هذا الاكتشاف الغير مسبوق- انهم كلهم مصريين ..هما بس مش غلبانين زي الاولانيين ...و لا انسب لنفسي اي فضل في هذا الاكتشاف إذ اكتشفت ان هناك الكثيرين الذين توصلوا اليه في اوقات متباينة

و سيخرج على الان احد الاشخاص الذين ملوا من قراءة هذا التحليل الفذ قائلا "خلاص يا ستي انا السبب في الفوضى كفاية باه و الت و اف فور"

يا عم خلاص حاقصر ...هو بس لو صبر القاتل على المقتول !!!

و عشان ما حدش يفهم من كل اللي قلته ان قصدي ان احنا السبب احب اقوله آه و الف آآآآه من هما لحد ال2017 

في حد مؤدب بيسال و بيقول لوحدنا يا هانم ؟؟

احنا المصريين لوحدنا ؟؟اقوله آآآآه و الله آآآآآه

بس قبل ما تحدف اي حاجة عشان انا سامعة همهمة و اصوات مش مطمئنة احب احكي لكم قصة القرود الخمسة 

"نعم؟؟؟" ايوه القرود الخمسة

في اوضة و في سلم و في سباطة موز محترمة متعلقة فوق السلم خبط لصق.و هما يتم السماح للقرود الخمسة بالدخول للغرفة و ما ان يبدأ القرود استباق بعضهم البعض في الصعود للحصول على اكلتها المفضلة حتى يتم رشها بالماء بصورة متكررة و تبدا القردة الصعود مرة أخرى ثم تعاد الكرة برش الماء و إرهابهم به من جديد و هكذا دواليك حتى تتوقف القردة عن محاولة الصعود و تكتفي بالفرجة على الموز و القعود...يتم استبدال احد القرود بقرد جديد لم يرش بالماء و يبدا القرد بالصعود و من ثم تنقض القردة السابقة لمنعه و عندما يصر على ارتقاء السلم للحصول على الموز حتى تلتف القردة حوله و تبدأ في ضربه من جديد ..

يستبدل قرد من القردة التي تعرضت للرش بالماء و يبدا القرد الجديد بمحاولة الصعود و تبدا القردة جميعا بما فيها قرد المرحلة الثانية -الذي تعرض للضرب من زملاؤه حتى لا يصعد على السلم و يحصل على الموز الذي هو طعام القردة المفضل- بضرب القرد الجديد و هو لا يعلم لماذا و يتحول هو الاخر بعد ذلك من محاولة الصعود الى الاكتفاء باقعود و الفرجة..

اعتقد انكم فهمتم مغزى القصة الان و وصلكم مدلول القصة ومغزى السؤال و سلمولي على الفوضى